لآباس ياقلبي منالضيم لاباس

السلام عليكم ...

لاباس ياقلبي مـن الضيـم لابـاس .. وش حيلتـي دام الليـالـي عنـيـده
وش حيلتي مادمت من جملة النـاس .. والوقـت حادينـي علـى مايـريـده

حالة كسير(ن)عاقته قـب الافـراس.. فوقـه شجـاع القـوم والا عقيـده
يشكي وجع ساق(ن)غدت تقل مقواس.. وان صاح صيحـات الخـلا ماتفيـده

في لاهب الجوزاء والاريـاق يبـاس .. الحلـق يابـس والمـوارد بعـيـده
جمر العطش في ضامره مثل الامواس .. والروح بشمـوس القوايـل وحيـده

~~~~~~~~~~~

منها سهر عيني وهرجات الانجـاس ..مثل المناجل فـي هشيـم الحصيـده
وعين الخبيث اللي بالاحبـاب بـلاس .. والصبـح يرسـل بالخباثـه بريـده

لا صاد له علم(ن)بدى قرع الاجراس..يركض وروحـه بالسوالـف سعيـده
في صاحب(ن)دونه مقافـل وحـراس .. وناس(ن)نفوسه بالحرايـب زهيـده

حطوا لها عقـد الحبايـل والامـراس .. ومن قارب الغالـي شباكـه تصيـده
لاوالله الا حـال مـن دونـه اليـاس .. ياس(ن)سكن بالقلب يشفـط وريـده

شاد القصور بغبن قلبي على سـاس .. يودع جروح القلـب ينـزف صديـده
ويلي على اللي كنها عيـن قرنـاس .. له مخلب(ن)يمزر عـروق الطريـده

عينه تشوف بنايد الروض مـرواس .. ويودع فروق الصيـد مالـه شريـده
اصفى من الجوهر على عقد الالماس .. حدت شجـون القلـب تنثـر قصيـده ..






وسلامتكم..